Reganosa, ¿pataca quente?
Por MarcosPerez
Xun 3A manifestación celebrada hoxe en Ferrol baixo o lema “Liberdade para Bastida, planta de gas fóra da Ría” foi un éxito completo. A planta de Reganosa instalouse na ría de xeito moi silandeiro, sen facer demasiado ruído, e con sentenzas xudiciais na súa contra. Sentenzas, que así e todo, non tiveron demasiada repercusión. Pero en Ferrolterra a sociedade civil está viva (e cabreada, ademais) e non lle abondan os argumentos conciliadores de “si, é ilegal, pero é que é moi necesaria para Galicia” ou “si, é ilegal, pero é que desmantelala agora…”. Á cidadanía xa non lle valen os argumentos de “feitos consumados”.
Reganosa, cunha oposición social activa e crecente, ameaza con se converter nunha pataca quente. ¿Para quen? Para todos, pero sobre todo para PSOE e BNG. Para Touriño e Quintana, que hoxe realizaron declaracións ambiguas e incómodas, para os conselleiros de Industria e Medio Ambiente, e moi especialmente para Vicente Irisarri, flamante alcalde de Ferrol, elixido cun grande apoio social que reclamaba un xiro á esquerda na cidade.
¿Converterase Reganosa nun asunto clave nas axendas políticas e mediática de toda a comarca de Ferrolterra? ¿Emerxerá unha oposición social maioritaria, como a que durante anos reclamou en Pontevedra o traslado de ENCE? ¿A quen queimará esta pataca quente?
